ខេត្តបន្ទាយមានជ័យ ៖ ដោយសារតែអំណាចប្រមូលផ្ដុំ បក្សពួកនិយម ធ្វើអោយប្រព័ន្ធច្បាប់គ្មានតម្លាភាព គ្មានអព្យាក្រិដ្ឋ សច្ចៈធម៌ និងយុត្តិធម៌ នៅខេត្តបន្ទាយមានជ័យ​។

នៅថ្ងៃទី០៨ ខែកុម្ភៈ ឆ្នាំ២០២២នេះ ជីដូនជរាទុរគតជន​ រស់នៅម្នាក់ឯង ឈ្មោះ ទុយ តិច អាយុ៧៥ឆ្នាំ រស់នៅភូមិ គីឡូម៉ែតលេខ០៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ បានសំណូមពរដល់ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ​ ហ៊ុន សែន ជួយផ្ដល់យុត្តិធម៌ ដែលលោកយាយ​ ត្រូវបានឈ្មោះ ងួន ហ៊ាង ភេទស្រី អាយុ៦២ឆ្នាំ រស់នៅភូមិបាលល័យ សង្កាត់ប៉ោយប៉ែត​ ក្រុងប៉ោយប៉ែត រំលោភយក។

លោកយាយ ទុយ តិច បានលើកឡើងថា គាត់បានប្ដឹងបុគ្គលខាងលើ អស់រយៈពេល​ ២០ឆ្នាំមកហើយ គឺចាប់ពីថ្នាក់ភូមិ ឃុំ ស្រុក ខេត្ត រហូតដល់តុលាកាកំពូល គាត់បានឈ្នះក្ដី នៅសាលាកំពូល និងសាលក្រមចូលជាស្ថាពរ នៅថ្ងៃទី៣០ ខែវិច្ឆិកា ឆ្នាំ ២០០៦ រហូតមកដល់ ថ្ងៃទី០៨​ ខែកុម្ភៈ ឆ្នាំ២០២២នេះ រូបគាត់នៅតែមិនទទួលបានភាពយុត្តិធម៌ ពីអ្នកច្បាប់នៅខេត្តបន្ទាយមានជ័យ។ ពោល​ គឺបុគ្គលឈ្មោះ​ ងួន ហ៊ាង នៅតែរំលោភបំពាន នៅលើដីកម្មសិទ្ធិរបស់គាត់ និងរំលោភលើសាលក្រមរបស់តុលាកាកំពូល លេខ៣៦៨ ចុះថ្ងៃទី៣០​ ខែវិច្ឆិកា ឆ្នាំ២០០៦ និងសាលក្រមចូលស្ថាពរនៅថ្ងៃទី៣០ ខែវិច្ឆិកា​ ឆ្នាំ២០០៦ ធ្វើអោយរូបគាត់​ បាត់បង់នូវសិទ្ធិរស់នៅ និងសិទ្ធិរស់រាន នៅលើដីកម្មសិទ្ធិរបស់ខ្លួន ដែលមានទំហំ​ ៣០ម៉ែត្រ គុណ ៤០ម៉ែត្រ ស្ថិតនៅភូមិគីឡូម៉ែត្រ០៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។

លោកយាយម្ចាស់ដី​ បានបន្តថា មានអ្នកធំជាច្រើននាក់ នៅពីក្រោយធ្វើជាខ្នងបង្អែក អោយបុគ្គលដែលរំលោភយកដីរបស់គាត់ ពោលគឺ មានបុគ្គលជាមន្រ្ដីមួយចំនួនតូច ចាប់ពីស្រុក ខេត្ត និងមានលោកផ្កាយពីរ នៅក្រសួងការពារជាតិម្នាក់នៅពីក្រោយខ្នង ទើបសាលដីកាសាលាកំពូលគ្មានប្រសិទ្ធិភាព និងមានចេតនាលេបយកដីរបស់គាត់ទាំងមូល។

ជុំវិញករណីខាងលើ ក្រុមការងារយើង​ មិនបានស្វែងរកសុំការបំភ្លឺ ពីសមីពាក់ព័ន្ធនៅឡើយទេ ព្រោះគ្មានលេខទូរស័ព្ទទំនាក់ទំនង។ បើការចុះផ្សាយ​ មិនពិតត្រង់ណានោះ យើងខ្ញុំ​ នឹងរងចាំធ្វើការបកស្រាយបំភ្លឺជូនវិញ តាមរយៈទូរស័ព្ទលេខ 071​ 3​ 999​ 997​ ,​ 093​ 600​ 793​ ៕​ ដោយ​ ៖​ គេហទំព័រ ស្រទាប់យុវវ័យ