ឧត្តរមានជ័យ ៖ នាព្រឹកថ្ងៃ០៦ ខែមករា ឆ្នាំ២០២៥នេះ នៅទីធ្លានៃមាត់ច្រកអន្តរជាតិជាំ ក្នុងស្រុកអន្លង់វែង ខេត្តឧត្តរមានជ័យ មានកម្មវិធីស្តីពី ការបន្ថែមនូវម៉ោងបើក និងបិទច្រកទ្វាព្រំដែនទ្វេភាគីកម្ពុជា ថៃ អន្តរ:ជាតិជាំ ដោយអនុវត្តតាមសេចក្តីប្រកាសរបស់ក្រសួងមហាផ្ទៃ នៃព្រះរាជាណាចក្រកម្ពុជា។

កម្មវិធីនេះ ដោយមានការអញ្ជើញចូលរួមពីឯកឧត្ដម មាន ចាន់យ៉ាដា អភិបាលខេត្តនៃគណៈអភិបាលខេត្ដឧត្ដរមានជ័យ អភិបាលរងខេត្ដ ប្រធានមន្ទីរជុំវិញខេត្ត កម្លាំងប្រដាប់អាវុធទាំងបីប្រភេទ មន្ត្រីរាជការគ្រប់លំដាប់ថ្នាក់ក្នុងខេត្ត និងលោក ងួន ទ្ធីរិទ្ធ អភិបាលនៃគណ:អភិបាលស្រុកអន្លង់វែង អភិបាលរងស្រុកគ្រប់រូប មន្ត្រីគ្រប់លំដាប់ថ្នាក់។ ដឹកនាំដោយវត្តមាន ឯកឧត្តម មាន ចាន់យ៉ាដា ជាគណ:អធិបតី រួមជាមួយមន្ត្រីរាជការគ្រប់រូបនៃខេត្តស៊ីសាកេត ប្រទេសថៃ ដឹកនាំដោយ ឯកឧត្តម អនុផុង ស៊ុកសំុនិត អភិបាលនៃគណ:អភិបាលខេត្តស៊ីសាកេត ។

ក្នុងឱកាសនោះដែរ ឯកឧត្តមអភិបាលខេត្តស៊ីសាកេត និងឯកឧត្តម មាន ចាន់យ៉ាដា អភិបាលនៃគណ:អភិបាលខេត្តឧត្តរមានជ័យ បានឡើងអាននូវសេចក្តីប្រកាសរបស់ក្រសួងមហាផ្ទៃ ស្តីពីការបន្ថែមម៉ោងបិទ និងបើកច្រកទ្វាព្រំដែនអន្តរជាតិជាំ។ បន្ទាប់មក បានថតរូបអនុស្សាវរីយ៍ជាមួយគ្នានៅមុខស្លាកច្រកទ្វាព្រំដែនអន្តរជាតិជាំចំនួន ៤សន្លឹក ៖

ទី១ ៖ គណ:អភិបាលខេត្តទាំង២ ១សន្លឹក
ទី២ ៖ គណ:ប្រតិភូទាំង ២ខេត្ត ១សន្លឹក
ទី៣ ៖ ឯកឧត្តម អភិបាលខេត្ត ស៊ីសាកេត ថតជាមួយភាគីពាក់ព័ន្ធខាងប្រទេសថៃ ១សន្លឹក
ទី៤ ឯកឧត្តម មាន ចាន់យ៉ាដា ថតរូបជាមួយមន្ត្រីជុំវិញខេត្ត ស្រុកគ្រប់រូប ខាងប្រទេសកម្ពុជា ១សន្លឹក។

ជាបន្ត ភាគីខាងថៃ និងកម្ពុជា បានជូននូវវត្ថុ និងកន្ត្រកអនុស្សាវរីយ៍ឆ្នាំថ្មី រវាងគ្នានិងគ្នា។
- ឯកឧត្តមអភិបាលខេត្តឧត្តរមានជ័យ និងឯកឧត្តមអភិបាលខេត្តស៊ីសាកេត
- លោកមេបញ្ជាការយោធភូមិភាគទី៤ ខាងកម្ពុជា និង លោកមេបញ្ជាការយោធភូមិភាគទី ២ខាងប្រទេសថៃ
- លោក ងួន ទ្ធីរិទ្ធ អភិបាលនៃគណ:អភិបាលស្រុកអន្លង់វែង និងអភិបាលស្រុក ភូស៊ីង ខេត្តស៊ីសាកេត ប្រទេសថៃ
បន្ទាប់មកក៍មានពិធី រាប់បាតរួមគ្នាជាមួយភាគីកម្ពុជានិងថៃ ជូនដល់ព្រះសង្ឃផងដែរ

ក្នុងសេចក្តីប្រកាសនូវម៉ោងបិត និងបើកបន្ថែមខាងលើ នៃច្រកទ្វាអន្តរជាតិជាំ គឺខាងក្រសួងមហាផ្ទៃ បានកំណត់បន្ថែមដោយតម្រូវអោយបើកច្រកចាប់ពីម៉ោង ៧:០០នាទីព្រឹក រហូតដល់ម៉ោង ១០យប់ ដោយបន្ថែមលើដំណើរការបើកច្រកមុនៗគឺបើកនូវម៉ោង ៧:០០នាទីព្រឹក បិតវិញនូវម៉ោង ៨:០០នាទីយប់ ៕